Bainvegni tar il Post da cussegliaziun per victimas da discriminaziun rassistica en il chantun Grischun
Il post da cussegliaziun porscha cussegl e sustegn cumpetent a tut las persunas privatas dal chantun Grischun, ch'èn pertutgadas directamain u indirectamain da discriminaziun rassistica. Persunas directamain pertutgadas, ma er confamigliaras e confamigliars, perditgas u ulteriuras terzas persunas pon sa drizzar al post da cussegliaziun. I vegnan er acceptadas annunzias anonimas.
Nossas cussegliadras e noss cussegliaders sa basan sin la suandanta tenuta fundamentala:
- Ir enturn cun respect: avertadad, acceptanza e respect envers tut las persunas che tschertgan cussegl.
- Parzialitad: Las collavuraturas ed ils collavuraturs dal post da cussegliaziun lavuran en parzialitad e s'engaschan sulettamain per ils giavischs da lur clientas e clients. La finamira è da rinforzar e da promover las persunas pertutgadas da discriminaziun sco er da meglierar lur situaziun da vita.
- Mantegniment da l'autonomia: Activitads vegnan mo introducidas cun il consentiment explicit da la persuna che tschertga cussegl.
- Colliaziun: Per fatgs cumplexs u per cas da discriminaziun rassistica entaifer l'administraziun po vegnir recurrì ad ulteriurs furniturs da servetschs spezialisads per pudair porscher ina cussegliaziun ed in sustegn adequat per mintga persuna e per mintga situaziun.
- Gratuit: Per persunas che tschertgan cussegl è la cussegliaziun en mintga cas gratuita. En cas da basegn vegnan engaschads interpretas ed interprets interculturals per discurs. Er quests custs vegnan surpigliads dal post da cussegliaziun.
Definiziun da la noziun "discriminaziun rassistica"
Discriminaziun rassistica è mintga pratica che priva umans da lur dretgs, che als tracta en moda malgista u intoleranta, che als umiliescha, offenda, smanatscha u che periclitescha lur corp e lur vita, e quai pervia da caracteristicas fisionomicas, pervia d'ina derivanza etnica, pervia da caracteristicas culturalas (lingua, num) u pervia d'ina appartegnientscha religiusa. Discriminaziun po capitar en il mintgadi, a la lavur, en il quartier d'abitar, en scola, durant far sport, en la vita privata, en l'administraziun publica u er sin via.
Tar la discriminaziun rassistica vai en emprima lingia per l'effect e betg per il motiv.
Furmas da discriminaziun rassistica
Ina discriminaziun directa è in dischavantatg inadmissibel d'ina persuna che sa basa directamain sin ina caracteristica persunala effectiva u supponida.
Ina discriminaziun indirecta è avant maun, sche princips ch'èn atgnamain admess e neutrals han in effect dischavantagià sin tschertas gruppas.
Da discriminaziun multipla vegni discurrì, sch'ina persuna vegn dischavantagiada a medem temp pervia da pliras caracteristicas da discriminaziun (p.ex. origin ed impediment / schlattaina / orientaziun sexuala / vegliadetgna).
Ulteriurs links
Sut ils suandants links chattais Vus ulteriuras infurmaziuns davart il tema rassissem ed infurmaziuns praticas per ir enturn cun rassissem en il mintgadi e per cumbatter il rassissem:
Ina persuna spezialisada dal post da cussegliaziun As vegn a contactar uschè svelt sco pussaivel suenter avair retschavì Vossa communicaziun per fixar in emprim termin da discurs.